متحدہ عرب امارات کے ویزہ قوانین میں بڑی اصلاحات، غیر ملکی ماہرین اور سیاحوں کے لیے نئی سہولتیں

ویب ڈیسک: متحدہ عرب امارات (UAE) نے ویزہ قوانین میں بڑی اصلاحات متعارف کرا دی ہیں، جن کا مقصد غیر ملکی ماہرین، سرمایہ کاروں، کاروباری افراد اور سیاحوں کو مزید سہولت فراہم کرنا ہے۔

ماہرین کے مطابق یہ نئے ویزہ قوانین خطے میں سرمایہ کاری، روزگار اور سیاحت کو فروغ دینے کی جانب ایک اہم پیش رفت ہیں۔

نئے ویزوں کی تفصیلات

آرٹیفیشل انٹیلیجنس ویزہ: یو اے ای نے جدید ٹیکنالوجی میں ماہرین کے لیے خصوصی ویزہ متعارف کرایا ہے تاکہ عالمی سطح کے ہنر مند افراد کو مواقع فراہم کیے جا سکیں۔

ایونٹ ویزہ: کانفرنسز، فیسٹیولز، نمائشوں اور کھیلوں کی سرگرمیوں میں شرکت کرنے والوں کے لیے ایک نیا ایونٹ ویزہ جاری کیا جائے گا۔

سیاحت کے لیے ملٹی پل انٹری ویزہ: کروز شپ یا تفریحی شپ کے ذریعے یو اے ای آنے والے سیاحوں کو ایک ہی ویزے پر بار بار داخلے کی سہولت دی جائے گی۔

وزٹ ویزہ برائے دوست و رشتہ دار: دوستوں کو اسپانسر کرنے کے لیے کم از کم 15 ہزار درہم ماہانہ آمدنی لازمی قرار دی گئی ہے۔

بزنس ویزہ: کاروباری افراد کو صرف مالی ثبوت فراہم کرنے پر بزنس ویزہ جاری کیا جائے گا، جبکہ بیرون ملک کمپنی رکھنے والے افراد کو بھی اس ویزے کی سہولت حاصل ہو گی۔

ڈرائیورز کے لیے نیا اصول: غیر ملکی ڈرائیورز کے ویزے صرف لائسنس یافتہ ٹرانسپورٹ کمپنیاں ہی اسپانسر کر سکیں گی۔

ان اصلاحات کو خطے میں معاشی سرگرمیوں کو بڑھانے اور ہنر مند افراد کو راغب کرنے کے لیے ایک اسٹریٹجک قدم قرار دیا جا رہا ہے۔